გერმანიის ულტრამემარჯვენე პარტიამ „ალტერნატივა გერმანიისთვის“ აღმოსავლეთში დიდი გამარჯვება მოიპოვა, თუმცა უმრავლესობა ვერ მოიპოვა
პარტიამ „ალტერნატივა გერმანიისთვის“ (AfD) გადამწყვეტი გამარჯვება მოიპოვა გერმანიის აღმოსავლეთ ფედერალურ საქსონია-ანჰალტში და გაცილებით გაუსწრო ძირითად კონკურენტებს. წინასწარი შედეგები აჩვენებს, რომ მას აბსოლუტური უმრავლესობა არ აქვს, თუმცა AfD აცხადებს, რომ მან მმართველობის მანდატი მოიპოვა. მეორე ადგილზე მმართველი „სოციალ-დემოკრატიული კავშირი“ გავიდა.
Reuters-ის ცნობით, ეს არის პირველი შემთხვევა მეორე მსოფლიო ომის შემდეგ, როდესაც გერმანიაში უკიდურესად მემარჯვენე ძალამ რეგიონულ არჩევნებში პირველი ადგილი დაიკავა.
შტატის ქარიზმატულმა ლიდერმა, ულრიხ ზიგმუნდმა (მაღლა ფოტოზე შუაში), განაცხადა, რომ ეს „სენსაციურია“ და მათ სურთ მმართველობა რაც შეიძლება მალე დაიწყონ.
„ეს მხოლოდ საქსონია-ანჰალტს არ ეხება“, – განუცხადა ზიგმუნდმა მხარდამჭერებს. „ეს მთელი გერმანიისთვის სიგნალია – თავდაჯერებულობის სიგნალი“.
საქსონია-ანჰალტის მოსახლეობა მცირეა, 2.1 მილიონი და ამ მხარის ადგილობრივი დაზვერვა პარტიას „ალტერნატივა გერმანიისთვის“ (AfD) „მემარჯვენე ექსტრემისტულად“ აფასებს, რასაც 35 წლის ზიგმუნდი უარყოფს.
პარტიამ, „ალტერნატივა გერმანიისთვის“ ხმების 43.8% მიიღო და რეგიონულ პარლამენტში 83-დან 39 მანდატი მოიპოვა და აბსოლუტური უმრავლესობისთვის, რაც 42 მანდატს წარმოადგენს, სამი მანდატი დააკლდა.
გერმანიის კანცლერის, ფრიდრიხ მერცის პარტიამ, „ქრისტიან-დემოკრატიულმა კავშირმა“ ხმების 17.2% მიიღო და 15 მანდატი მოიპოვა.
ცენტრისტულ-მემარცხენე „სოციალ-დემოკრატიულმა პარტიამ“ ხმების 9.3% მიიღო, „მწვანეებმა“ – 8.9%, ხოლო „მემარცხენეებმა“ – 8.6%. თითოეულმა მათგანმა პარლამენტში რვა მანდატი მოიპოვა.
პარტიის ლიდერი ალის ვაიდელი აცხადებს, რომ მისი პოლიტიკური ძალა „რეკორდულ შედეგებს“ აჩვენებს არა მხოლოდ საქსონია-ანჰალტში, არამედ აღმოსავლეთ გერმანიასა და მომავალში ფედერალურ დონეზეც.
ალის ვაიდელმა გერმანიის ხელისუფლებაში მოსვლის შემთხვევაში მისი მიზნების შესახებ განაცხადა: „პირველი 100 დღის განმავლობაში დავხურავ საზღვრებს, გავაუქმებ მიგრანტებისთვის სოციალურ შეღავათებს და განვახორციელებ გერმანიაში ყველაზე მასშტაბურ დეპორტაციებს.“
აშშ-ის პრეზიდენტმა დონალდ ტრამპმა გერმანული ტელევიზიის ე.წ. სქრინშოტი თავის Truth Social პლატფორმაზე გამოაქვეყნა, შემდეგ კი რუსეთის პრეზიდენტის წარმომადგენელმა კირილ დმიტრიევმა ტრამპის პოსტის „სქრინშოტი“ გააზიარა და მიესალმა „პრაგმატული AfD-ის ისტორიულ გამარჯვებას“.
დმიტრიევმა ადრეც შეაქო რუსეთის მიმართ მეგობრული AfD, როგორც „იმედისა და გონიერების, თანამშრომლობის, სიმართლისა და გერმანიის იმედის პარტია“. გასულ წელს გერმანიის ფედერალური არჩევნების წინ, აშშ-ის ვიცე-პრეზიდენტმა ჯეი დი ვენსმა მხარი დაუჭირა ულტრამემარჯვენე პარტიას, რაც გერმანიაში პოლიტიკურ ჩარევად მიიჩნიეს და გააკრიტიკეს.
პოლონეთის მემარჯვენე ცენტრისტმა პრემიერ-მინისტრმა დონალდ ტუსკმა შედეგი სრულიად განსხვავებულად შეაფასა და თქვა, რომ „პოლონეთში მხოლოდ იდიოტებსა და მოღალატეებს შეუძლიათ AfD-ს ტრიუმფით გაიხარონ“.
ალის ვაიდელსა და მის პარტიას უკრაინის მიმართ რადიკალურად ნეგატიური პოზიცია აქვთ და ომის დაწყებიდანვე აქტიურად გამოდიან უკრაინის მხარდაჭერის წინააღმდეგ. ვაიდელი კატეგორიულად მოითხოვს, რომ გერმანიამ შეწყვიტოს უკრაინისთვის იარაღისა და ფულადი დახმარების მიწოდება.
www.guardiange.com