ბრიტანელი პოლიტიკოსის, ენ უიდიკომბის მკვლელობაში ეჭვმიტანილი 28 წლის მამაკაცი დააკავეს
პოლიციის ცნობით, სამხრეთ იორკშირში ბრიტანელი პოლიტიკოსის, ენ უიდიკომბის მკვლელობაში ეჭვმიტანილი 28 წლის მამაკაცი დააკავეს.
„ეჭვმიტანილი, რომელიც დიდი ბრიტანეთის თეთრკანიანი მოქალაქეა, ამჟამად პოლიციის პატიმრობაშია“, – ნათქვამია დევონისა და კორნუოლის პოლიციის განცხადებაში.
უიდიკომბი, ყოფილი „კონსერვატორი“ მინისტრი, რომელიც ამჟამად „რეფორმა დიდი ბრიტანეთის“ პრესსპიკერი იყო, ხუთშაბათს, დევონის შტატის ქალაქ ჰეიტორში, საკუთარ სახლში, მძიმე დაზიანებებით გარდაცვლილი იპოვეს. პოლიცია ვარაუდობს, რომ მასზე თავდასხმა თითქმის 24 საათით ადრე განხორციელდა.
მკვლელობიაში ეჭვმიტანილი 26 წლის მამაკაცი ნიუტონ აბოტში, 18 კილომეტრის დაშორებით, შაბათს გაათავისუფლეს, რის შემდეგაც პოლიციამ განაცხადა, რომ ის „გამოძიების ნაწილი აღარ იყო“.
პოლიციის ცნობით, ბოლო დაკავება სამხრეთ იორკშირის ერთ-ერთ მისამართზე მოხდა, რომელიც უიდიკომბის დევონში მდებარე საკუთრებიდან დაახლოებით 430 კილომეტრში მდებარეობს.
დევონისა და კორნუოლის პოლიციის ბოლო განახლებაში ნათქვამია: „ჩვენ მხარი დაგვიჭირა ჩრდილო-აღმოსავლეთ და სამხრეთ იორკშირის ანტიტერორისტულმა სამსახურმა, რომელმაც დაკავება დევონისა და კორნუოლის პოლიციის სახელით განახორციელა“.
„ამ დროისთვის, ჯერ კიდევ არ არსებობს ინფორმაცია, რომელიც მიანიშნებს, რომ ეს ტერორიზმთან დაკავშირებული ინციდენტია და, როგორც სამართალდამცავი ორგანო, ჩვენ ვინარჩუნებთ გამოძიების პრიორიტეტს.“
განცხადებაში ასევე დასძენენ: „ეს არის აქტიური გამოძიება და დღეს საღამოს დამატებითი ინფორმაცია არ გავრცელდება“.
პოლიციის ცნობით, უიდიკომბის ოჯახი უახლესი ამბების შესახებ ინფორმირებული იყო.
შაბათ-კვირის განმავლობაში დევონში, მოკლული პოლიტიკოსის კერძო საკუთრების გარშემო პოლიციის მნიშვნელოვანი რაოდენობა შენარჩუნდა, უიდიკომბის სახლთან მივიდნენ სასამართლო ექსპერტიზის წარმომადგენლებიც.
მოკლული პოლიტიკოსის ხსოვნას მის საცხოვრებელ სახლთან, დარტმურის ეროვნულ პარკში პატივი მიაგეს მოქალაქეებმა, მათ შორის „რეფორმა დიდი ბრიტანეთის“ ლიდერმა ნაიჯელ ფარაჯმა.
ფარაჯმა ჟურნალისტებს განუცხადა, რომ ის „შესანიშნავი ადამიანი“ და „სიტყვის თავისუფლების ყველაზე მხურვალე დამცველი“ იყო.
უიდიკომბის დიდი ხნის მძღოლმა, პიტერ ჰორალმა, შაბათს, შემთხვევის ადგილის მახლობლად ყვავილები მიიტანა და BBC-ს განუცხადა, რომ „უბრალოდ ვერ იჯერებდა“ მომხდარს.
„ის შესანიშნავი ქალბატონი იყო, ძალიან კეთილი“, – თქვა მან და დასძინა, რომ „თუ კითხვას დაუსვამდით, პასუხს მიიღებდით – ყოყმანის გარეშე“.
სხვადასხვა სპექტრის პოლიტიკოსებმა, მათ შორის მოქმედმა პრემიერ-მინისტრმა სერ კირ სტარმერმა და „კონსერვატიული პარტიის“ ლიდერმა კემი ბადენოხმა, გამოხატეს შოკი და მწუხარება უიდიკომბის გარდაცვალების გამო და გაიხსენეს მისი წვლილი საზოგადოებრივ ცხოვრებაში.
უიდიკომბის მენეჯმენტის გუნდმა 78 წლის ქალის გარდაცვალების შესახებ პირველად პარასკევს განაცხადა.
მალევე, უფროსი კონსტებლის თანაშემწემ, მეტ ლონგმანმა, განაცხადა, რომ გამოძიებაში თავდაპირველად კონტრტერორისტული ოფიცრები იყვნენ ჩართულნი. მათ ტერორიზმის ვერსია გამორიცხეს მას შემდეგ, რაც ვერ მოიძებნა სარწმუნო ინფორმაცია იმის შესახებ, რომ მისი სიკვდილი „პოლიტიკურად მოტივირებული დანაშაული“ იყო.
შაბათს, „ACC ლონგმანმა“ განაცხადა, რომ სამართალდამცავებმა გადაწყვიტეს, რომ ამ დროისთვის არ გაამჟღავნონ დამატებითი ინფორმაცია, მათ შორის პოტენციური ეჭვმიტანილების აღწერილობები ან სათვალთვალო კამერების ჩანაწერები.
„ასეთი ინფორმაციის ნაადრევად გამოქვეყნებამ შესაძლოა საფრთხე შეუქმნას მიმდინარე გამოძიებებს და შესაძლოა, საფრთხე შეუქმნას მომავალ საგამოძიებო შესაძლებლობებს“, – განაცხადა მან.
უიდიკომბის პოლიტიკური კარიერა რამდენიმე ათწლეულს გაგრძელდა, 1987 წლიდან 2010 წლამდე ის კენტის ოლქის მეიდსტოუნის პარლამენტის წევრი იყო „კონსერვატიული პარტიიდან“.
1994-1997 წლებში ჯონ მეიჯორის მთავრობაში იგი დასაქმების, სასჯელაღსრულებისა და შინაგან საქმეთა მინისტრის თანამდებობებს იკავებდა.
1997 წლის არჩევნებში „კონსერვატორების“ დამარცხების შემდეგ, მან მრავალი მაღალი თანამდებობა დაიკავა, მათ შორის ჯანდაცვის ჩრდილოვანი მდივნისა და შინაგან საქმეთა ჩრდილოვანი მდივნის თანამდებობები.
თემთა პალატიდან წასვლის შემდეგ, უიდიკომბი 2010 წელს გამოჩნდა BBC-ის გადაცემაში „Strictly Come Dancing“, ხოლო რვა წლის შემდეგ „Celebrity Big Brother“-ში მეორე ადგილი დაიკავა.
ის „ბრექსიტის პარტიას“ 2019 წელს შეუერთდა, სადაც 2019 წლიდან 2020 წლამდე ევროპარლამენტის წევრის რანგში სამხრეთ-დასავლეთ ინგლისს წარმოადგენდა.
2023 წელს ის გახდა „Reform UK“-ის წევრი, სადაც ის პარტიის იმიგრაციისა და სამართლიანობის სპიკერი იყო.