კიმ ჩენ ინი აცხადებს, რომ ჩრდილოეთ კორეის ბირთვული სტატუსი შეუქცევადია – „ამჟამინდელი მსოფლიო რეალობა ნათლად გვასწავლის, თუ რა არის სახელმწიფოს არსებობისა და მშვიდობის ნამდვილი გარანტია“

 ჩრდილოეთ კორეის ლიდერმა, კიმ ჩენ ინმა, პარლამენტში გამოსვლისას პოლიტიკური პრიორიტეტები წარადგინა და განაცხადა, რომ მისი ქვეყანა მუდმივად გააძლიერებს ბირთვულ ძალებს და სამხრეთ კორეას ყველაზე მტრულად განწყობილ სახელმწიფოდ მიიჩნევს.

კიმმა აღნიშნა, რომ ფხენიანის, როგორც ბირთვული იარაღის მქონე სახელმწიფოს სტატუსი შეუქცევადია და „თავდაცვითი ბირთვული შემაკავებელი ძალის“ გაფართოება აუცილებელია ეროვნული უსაფრთხოების, რეგიონული სტაბილურობისა და ეკონომიკური განვითარებისთვის.

როგორც ახალი ამბების სააგენტო „როიტერსი“ იტყობინება, მან უარყო იდეა, რომ ბირთვული განიარაღება ეკონომიკურ სარგებელზე ან უსაფრთხოების გარანტიებზე გაცვლილიყო და თქვა, რომ ჩრდილოეთ კორეამ უკვე დაამტკიცა, რომ ბირთვული ძალების შენარჩუნება განვითარების პარალელურად სწორი სტრატეგიული არჩევანი იყო.

„ამჟამინდელი მსოფლიო რეალობა, სადაც სუვერენული სახელმწიფოების ღირსება და უფლებები დაუნდობლად ირღვევა ცალმხრივი ძალისა და ძალადობის გამოყენებით, ნათლად გვასწავლის, თუ რა არის სახელმწიფოს არსებობისა და მშვიდობის ნამდვილი გარანტია“, – განაცხადა კიმმა ორშაბათს უზენაესი სახალხო ასამბლეისადმი, კომუნისტური ქვეყნის საკანონმდებლო ორგანოსადმი მიმართვისას.

მან დასძინა, რომ ბირთვულმა იარაღმა ომი შეაჩერა და სახელმწიფოს საშუალება მისცა, რესურსები ეკონომიკურ ზრდის, მშენებლობასა და ცხოვრების დონის გაუმჯობესაბისკენ მიემართა.

სამხრეთ კორეაში ანალიტიკოსების თქმით, კომენტარები ირანის წინააღმდეგ აშშ-ის სამხედრო ქმედებების ირიბ კრიტიკას წარმოადგენს.

„ამ გარემოებებმა კიდევ უფრო გაამყარა ფხენიანის დიდი ხნის არგუმენტი, რომ ბირთვული იარაღი აუცილებელია გარე ჩარევის შესაკავებლად და რეჟიმის გადარჩენის უზრუნველსაყოფად“, – განაცხადა ჩრდილოეთ კორეის კვლევების უნივერსიტეტის პროფესორმა იანგ მუ-ჯინმა.

კიმმა ასევე დაადანაშაულა შეერთებული შტატები და მისი მოკავშირეები რეგიონის დესტაბილიზაციაში კორეის ნახევარკუნძულთან ახლოს სტრატეგიული ბირთვული აქტივების განლაგებით, თუმცა თქვა, რომ ჩრდილოეთ კორეა აღარ მიიჩნევს საკუთარ თავს საფრთხის ქვეშ მყოფ ქვეყნად და გააჩნია ძალა, საჭიროების შემთხვევაში სხვებს დაემუქროს.

სამხრეთ კორეა ყველაზე მტრულად განწყობილ სახელმწიფოდ გამოცხადდა

კიმმა განაცხადა, რომ სამხრეთ კორეა „ყველაზე მტრულად განწყობილ სახელმწიფოდ“ იქნა აღიარებული და სეული გააფრთხილა, რომ ჩრდილოეთ კორეის სუვერენიტეტის ხელყოფის ნებისმიერ მცდელობას „დაუნდობლად, ყოყმანისა და თავშეკავების გარეშე“ უპასუხებენ.

ეს განცხადება ფხენიანის მიერ სეულის მიმართ პოზიციის გამკაცრების უახლესი ნიშანია მას შემდეგ, რაც კიმმა უარი თქვა მშვიდობიანი გაერთიანებისკენ მიმართულ ათწლეულების განმავლობაში გატარებულ პოლიტიკაზე და სამხრეთთან ურთიერთობები ორ მტრულად განწყობილ სახელმწიფოს შორის ურთიერთობებად გადაიქცა.

ანალიტიკოსები აკვირდებოდნენ რაიმე ნიშანს იმისა, რომ ეს ცვლილება კანონმდებლობაში იყო კოდიფიცირებული. სახელმწიფო მედიის ანგარიშში დეტალები არ იყო მოცემული.

კიუნგნამის უნივერსიტეტის წარმომადგენელმა ლიმ ეულ-ჩულმა განაცხადა, რომ ეს ენა „ფაქტობრივად ართმევს სამხრეთ კორეას თანამემამულე ერის ნებისმიერ სტატუსს“ და სცილდება წარსულში გამოყენებულ რიტორიკას, რომელიც სეულის დიპლომატიურ იზოლაციას ისახავს მიზნად.

მისი თქმით, ეს იყო „დეკლარაცია, რომელიც უარყოფდა სამხრეთ კორეის, როგორც პარტნიორის, ლეგიტიმურობას“.

სამხრეთ კორეის პრეზიდენტის ოფისმა კიმ ჩენ ინის განცხადებები „მშვიდობიანი თანაარსებობისთვის არასასურველად“ შეაფასა და დასძინა, რომ მხოლოდ დიალოგსა და თანამშრომლობას შეუძლია კორეის ნახევარკუნძულზე ურთიერთუსაფრთხოებისა და კეთილდღეობის უზრუნველყოფა.

მოდერნიზაციის ხუთწლიანი გეგმა

უსაფრთხოების პოლიტიკასთან ერთად, კიმმა ეკონომიკური პრიორიტეტები გამოკვეთა და მოუწოდა ოფიციალურ პირებს, სრულად განახორციელონ ახალი ხუთწლიანი განვითარების გეგმა, რომელიც ორიენტირებულია ინდუსტრიის მოდერნიზაციაზე, ელექტროენერგიისა და ნახშირის წარმოების გაზრდაზე, სურსათის წარმოების გაზრდასა და მთელი ქვეყნის მასშტაბით საცხოვრებელი სახლების მშენებლობის გაფართოებაზე.

საერთაშორისო შეფასებების თანახმად, ჩრდილოეთ კორეა მსოფლიოში ერთ-ერთი უღარიბესი ქვეყანაა, რომელსაც მკაცრი სანქციები და ქრონიკული დეფიციტი აქვს, რის გამოც მისი მოსახლეობის დიდი ნაწილი სახელმწიფო რაციონსა და არაფორმალურ ბაზრებზეა დამოკიდებული.

KCNA-ს ცნობით, პარლამენტის სესიაზე მიიღეს კონსტიტუციაში შესწორებები და კანონმდებლობა, რომელიც ამტკიცებს ახალ ხუთწლიან ეკონომიკურ გეგმას.

კანონმდებლებმა ასევე დაამტკიცეს 2026 წლის სახელმწიფო ბიუჯეტი, რომელიც თავდაცვის ხარჯებს მთლიანი ხარჯების 15.8%-მდე ზრდის, ხოლო დაფინანსება პირდაპირ ბირთვული შეკავებისა და საომარი შესაძლებლობების გაფართოებაზეა გამოყოფილი, ნათქვამია სესიაზე გამოქვეყნებულ ცალკე ბიუჯეტის ანგარიშში.

ასამბლეამ მოისმინა რუსეთის პრეზიდენტის, ვლადიმერ პუტინის მისალოცი წერილი, რომელმაც შეაქო კიმის ლიდერობა და პირობა დადო, რომ გაღრმავდება ყოვლისმომცველი სტრატეგიული პარტნიორობა მოსკოვსა და ფხენიანს შორის.