ამერიკის შეერთებული შტატების საპასუხოდ რუსეთი ქვეყნიდან 60 ამერიკელ დიპლომატს აძევებს და ხურავს აშშ-ის გენერალურ საკუნსულოს სანკტ-პეტერბურგში. აღნიშნული გადაწყვეტილების შესახებ საგარეო საქმეთა მინისტრმა, სერგეი ლავროვმა გამოაცხადა.
„ზუსტად ამ წუთებში აშშ-ის ელჩი ჰანტსმანი მოწვეულია ჩვენს სამინისტროში, სადაც ჩემი მოადგილე სერგეი რიაბკოვი აცნობს მას შეერთებულ შტატებთან დაკავშირებით მიღებული ზომებს, რაც მოიცავს ანალოგიური რაოდენობის დიპლომატების გაძევებას და ასევე სანკტ-პეტერბურგში აშშ-ის გენერალური საკონსულოს ფუნქციონირების შეჩერებას“, განაცხადა სერგეი ლავროვმა.
მან ასევე ხაზი გაუსვა, რომ სხვა ქვეყნებთან მიმართებაშიც, რომლებიც ვაშინგტონის კვალს გაჰყვნენ, ანალოგიური ზომები იქნება მიღებული.
ე.წ. სკრიპალის საქმის გამო, თითქმის 30-მა ქვეყანამ, ასევე ჩრდილო ატლანტიკურმა ალიანსმა საერთო ჯამში 150-მდე რუსი დიპლომატი გააძევა, მათგან ყველაზე მეტი რაოდენობა – 60 ვაშინგტონის მიერ იქნა გაძევებული. შეერთებულმა შტატებმა ასევე დახურა რუსეთის საკუნსულო სიეტლში.