დიდ ბრიტანეთში, ლონდონში, ბუნების ისტორიის მუზეუმის მიმდებარე ტერიტორიაზე ინციდენტი მოხდა.
ბრიტანული სამაუწყებლო კორპორაციის (BBC) ცნობით, ხალხით გადატვირთული ქუჩის ტროტუარზე ავტომობილი ფეხით მოსიარულეებს დაეჯახა.
შემთხვევის შედეგად არიან დაშავებულები. ლონდონის სასწრაფო-სამედიცინო სამსახურმა დახმარება 11 ადამიანს აღმოუჩინა. მათ უმრავლესობას დაზიანებები თავისა და ფეხების არეში აღენიშნებოდა. 9 ადამიანი საავადმყოფოშია გადაყვანილი.
ინციდენტის ადგილი სამართალდამცველებს აქვთ გადაკეტილი. მათ ადგილზე ერთი მამაკაციც დააკავეს.
პოლიცია აცხადებს, რომ ინციდენტის მოტივთან დაკავშირებით, გამოძიება მიმდინარეობს.