აშშ-ის ცენტრალურ სარდლობაში გამართულ ბრიფინგზე თავდაცვის მდივანმა პიტ ჰეგსეტმა განაცხადა, რომ ირანზე ცეცხლის ძალა მკვეთრად გაფართოვდება, პრეზიდენტმა ტრამპმა კი აღნიშნა, რომ აშშ ირანის დრონებსა და სარაკეტო სისტემებს „ყოველ საათში“ ურტყამს.
მან დასძინა, რომ დიდი ბრიტანეთის გადაწყვეტილება, აშშ-სთვის დიეგო გარსიას სამხედრო ბაზის გამოყენების ნებართვის მიცემის შესახებ, ვაშინგტონს თავდასხმების გაძლიერებაში დაეხმარება.
„სამწუხაროა, რომ ბრიტანელებმა პირველივე დღიდან არ თქვეს: „მიდით, განაგრძეთ და მიიღეთ წვდომა“, – თქვა ჰეგსეთმა და დაამატა: „მაგრამ ჩვენ მივაღწიეთ ამას“.
ამასობაში, გაერთიანებული სამეფოს პრემიერ-მინისტრმა სერ კირ სტარმერმა განაცხადა, რომ დიდი ბრიტანეთი ამჟამად აგზავნის დამატებით ოთხ Typhoon გამანადგურებელს, რომლებიც შეუერთდებიან ბრიტანეთის ესკადრილიას კატარში. პრემიერ-მინისტრის თქმით, დიდმა ბრიტანეთმა აშშ-ს ბრიტანული ბაზების გამოყენების უფლება მისცა „თავდაცვითი ოპერაციების განსახორციელებლად“.
ჰეგსეტმა ასევე დასძინა, რომ აშშ-ს შეუძლია თავისი კამპანიის გაგრძელება იმდენ ხანს, რამდენ ხანსაც სურს და რომ აშშ-ის რამდენიმე მოკავშირემაც დახმარების მზადყოფნა გამოხატა.
ჰეგსეტის თქმით, ტრამპს „უდიდესი ხმა“ ექნება იმის გადაწყვეტაში, თუ ვინ უხელმძღვანელებს ირანს, მაშინ როცა თავად ტრამპმა ამერიკულ მედიასაშუალებებს ადრე განუცხადა, რომ მას „მოუწევს ჩართვა“ შემდეგი ლიდერის დანიშვნაში.
ტრამპი აცხადებს, რომ ირანში აშშ-ის სახმელეთო ჯარების გაგზავნას არ აპირებს
აშშ-ის პრეზიდენტმა დონალდ ტრამპმა NBC News-ს განუცხადა, რომ ამჟამად ირანში აშშ-ის ჯარების გაგზავნა „დროის ფუჭად დაკარგვა“ იქნებოდა და რომ ის ახლა ამაზე არ ფიქრობს.
„ეს დროის ფუჭად დაკარგვაა. მათ ყველაფერი დაკარგეს. მათ დაკარგეს საზღვაო ფლოტი. მათ ყველაფერი დაკარგეს, რისი დაკარგვაც შეიძლებოდა“, – განუცხადა ტრამპმა ხუთშაბათს NBC-ს და დასძინა, რომ დარტყმების ტემპი და ინტენსივობა გაგრძელდება.
მან ირანის საგარეო საქმეთა მინისტრის, აბას არაყჩის, NBC-სთვის მიცემულ ინტერვიუში გაკეთებულ განცხადებას, რომ ირანი მზად იყო აშშ-ის ან ისრაელის სახმელეთო შეჭრისთვის, „ფუჭი კომენტარი“ უწოდა.
ტრამპმა ასევე განაცხადა, რომ მას სურდა ირანის ამჟამინდელი ხელმძღვანელობის სტრუქტურის „გასუფთავება“.
„ჩვენ გვინდა, რომ მათ კარგი ლიდერი ჰყავდეთ. ჩვენ გვყავს რამდენიმე ადამიანი, რომლებიც, ვფიქრობ, კარგ საქმეს გააკეთებენ“, – თქვა მან, მისთვის რომელიმე ფავორიტი კანდიდატის დასახელების გარეშე.
რა ხდება ახლო აღმოსავლეთში?
ომის დაწყებიდან მე-7 დღეს, ისრაელი აცხადებს, რომ ბეირუთსა და თეირანში დარტყმები განახორციელა; თავის მხრივ ირანიც ამბობს, რომ თელ-ავივს რაკეტები ესროლა; ბაჰრეინმა განაცხადა, რომ ირანმა სასტუმროსა და საცხოვრებელ შენობებს შეუტია, ხოლო კატარმა გაავრცელა ცნობა იმის შესახებ, რომ აშშ-ის ბაზაზე დრონით განხორციელებული თავდასხმა მოიგერია.
ამასობაში, არაბთა გაერთიანებულმა საამიროებმა საგანგებო განგაში გამოაცხადეს და მოსახლეობას თავშესაფრის ძიებისკენ მოუწოდეს მას შემდეგ, რაც ირანმა იქ ექვსი რაკეტა და 131 დრონი ჩამოაგდო.
ომანიდან გაფრენის შემდეგ, ლონდონის სტენსტედის აეროპორტში დაეშვა დიდი ბრიტანეთის პირველი სამთავრობო რეისი, რომელმაც ახლო აღმოსავლეთიდან მოქალაქეები ჩაიყვანა.
ფოტოებზე: ღამის განმავლობაში მიმდინარე დარტყმები ახლო აღმოსავლეთში
ირანთან აშშ-ისრაელის ომის მეშვიდე დღეს, ახლო აღმოსავლეთში ღამით დარტყმების შესახებ ინფორმაცია გავრცელდა.
