საქართველო

„ქართუ ბანკის“ გაკოტრების საქმეზე ზურაბ ადეიშვილს 5 წლითა და 3 თვით პატიმრობა შეეფარდა, ნიკა მელიას კი 25 000-ლარიანი ჯარიმა

თბილისის საქალაქო სასამართლომ „ქართუ ბანკის“ გაკოტრების საქმეზე ბრალდებულების, სააკაშვილის ხელისუფლების იუსტიციის მინისტრის, ზურაბ ადეიშვილისა და „ნაციონალური მოძრაობის“ პოლიტიკური საბჭოს თავმჯდომარის, ნიკა მელიას მიმართ გადაწყვეტილება გამოაცხადა.

ნიკა მელიას ბრალი ორი მუხლით ჰქონდა წარდგენილი. სსკ-ის 332-ე მუხლით წარდგენილ ბრალდებაში, რაც სამსახურებრივ უფლებამოსილების ბოროტად გამოყენებას გულისხმობს, მელია დამნაშავედ იქნა ცნობილი და 25 000 ლარიანი ჯარიმა განესაზღვრა, ხოლო 205-ე მუხლში კი გამართლდა (ქონების დამალვა მოჩვენებით, ან თვალთმაქცური გარიგებით).

ამასთან, ნიკა მელიას დამატებით სასჯელად ორი წლით და სამი თვის ვადით თანამდებობის დაკავების უფლება ჩამოერთვა. იგი განაჩენის გამოცხადებას არ ესწრებოდა.

სასამართლომ ზურაბ ადეიშვილი ყველა წარდგენილ ბრალდებაში დამნაშავედ ცნო და მას ხუთი წლითა და სამი თვით პატიმრობა შეეფარდა.

აღნიშნულ საქმეზე ნიკა მელიასა და ზურაბ ადეიშვილს ბრალი 2013 წელს წაუყენეს. ზურაბ ადეიშვილს დაუსწრებლად აღკვეთის ღონისძიების სახით პატიმრობა ჰქონდა შეფარდებული, ხოლო ნიკა მელიას 25 000-ლარიანი გირაო.