საქართველოს სტატისტიკის ეროვნულმა სამსახურმა ეროვნული ანგარიშების ახალი ინტერაქციული პორტალის პრეზენტაცია გამართა.
საქსტატის აღმასრულებელი დირექტორის, გოგიტა თოდრაძის განცხადებით, ეროვნული ანგარიშების პორტალი ქვეყნის ძირითადი მაკროეკონომიკური მაჩვენებლების ანალიტიკური გაანალიზების შესაძლებლობას იძლევა.
მისივე თქმით, პორტალი სამი ნაწილისგან შედგება – მთლიანი შიდა პროდუქტი, ეროვნული ანგარიშები და რეგიონული ანალიზი. პორტალში სპეციალური სექციაა, სადაც გრაფიკულად წარმოდგენილია მთლიანი შიდა პროდუქტი წარმოების, დანახარჯებისა და შემოსავლების მეთოდების მიხედვით.
ეროვნული ანგარიშების ნაწილი მომხმარებელს საშუალებას აძლევს გრაფიკულად იხილოს ეროვნული ანგარიშების სრული მიმდევრობა, როგორც ცალკეული წლისთვის, ისე დინამიკაში წლების მიხედვით.