სსიპ მარნეულის მუნიციპალიტეტის სოფელ ალავარის აზერბაიჯანულენოვანი საჯარო სკოლის მოსწავლეებმა ქართული ენის დღისადმი მიძღვნილ ღონისძიებაზე ქართველი პოეტების ლექსები წარმოთქვეს და 14 აპრილის შესახებ ისაუბრეს.
ღონისძიება ალავარის საჯარო სკოლის ქართულის როგორც მეორე ენის მასწავლებლების – ციცინო ბურჯალიანის, ირმა მარგიანისა და ანუშ მეგრაბიანის ინიციატივით და სკოლის დირექტორის, მულქადარ ისმაილოვის ხელშეწყობით გაიმართა.
გთავაზობთ ალავარის საჯარო სკოლაში 19 აპრილს გადაღებულ ვიდეო მასალას.
14 აპრილს საქართველო დედა ენის დღეს აღნიშნავს. 1978 წლის 14 აპრილს თბილისში, რუსთაველის გამზირზე ათასობით ადამიანი, მათ შორის სტუდენტები, საბჭოთა კავშირის კონსტიტუციაში ცვლილების შეტანის წინააღმდეგ გამოვიდნენ, რომლის მიხედვით, ქართული ენა სახელმწიფო ენის სტატუსს კარგავდა. პროტესტმა შედეგი გამოიღო და საბჭოთა ხელისუფლება იძულებული გახდა კონსტიტუციაში ცვლილების შეტანაზე უარი ეთქვა.