ჩვენი დასავლელი პარტნიორები უკვე სრულ სურათს ფლობენ რუსეთის მიზნების შესახებ და ეს არის ტენდენცია, რომელიც აშკარაა რუსეთის სამეზობლოში, საქართველოში, მოლდოვაში, უკრაინაში, ყარაბაღში კონფლიქტებით. ეს არის შაბლონი, ეს არის რუსეთის ტაქტიკა, – განაცხადა საქართველოს პრემიერ-მინისტრმა, მამუკა ბახტაძემ მაკკეინის ინსტიტუტისა და ეკონომიკური პოლიტიკის კვლევის ცენტრის (EPRC) ორგანიზებით მიმდინარე მეოთხე ყოველწლიურ საერთაშორისო კონფერენციაზე.
კონფერენციაზე „ფაინენშელ თაიმსის“ მთავარმა რედაქტორმა, მამუკა ბახტაძეს ჰკითხა – შესაძლებელად მიგაჩნიათ თუ არა პუტინის მმართველობის პირობებში საქართველოს ტერიტორიულ მთლიანობაზე შეთანხმება.
როგორც მამუკა ბახტაძემ აღნიშნა, საქართველოს აქვს საკუთარი სტრატეგია, საკუთარი ხედვა და ღირებულებები.
„ჩვენ სტრატეგიულ პარტნიორებს აქვთ გარკვეული ხედვა საქართველოსთან დაკავშირებით და ჩვენ გვაერთიანებს ღირებულებები. მაშასადამე, ძალიან რთული პროცესი იქნება. არ მაქვს ილუზიები, მაგრამ ჩვენ ასევე ვიცით, რომ თუ გადავხედავთ ისტორიას, რუსეთი ყოველთვის, ყოველთვის არა, მაგრამ ხშირად ცდილობდა პროგრესის, საერთაშორისო ვექტორის წინააღმდეგ წასვლას. ჩვენ ვცხოვრობთ 21-ე საუკუნეში, გლობალურ სამყაროში, გლობალურ ეკონომიკაში და რუსეთი თავისი პოლიტიკით მიდის მიმართულების წინააღმდეგ, ანუ მსოფლიო მიმართულებების წინააღმდეგ და პროგრესის წინააღმდეგ. მწამს, რომ განჭვრეტად მომავალში, რა თქმა უნდა, ეს მოხდება, ვინაიდან სხვა ალტერნატივა არ აქვს, რუსეთსაც არ აქვს სხვა ალტერნატივა. ყველა უნდა ჩაერთოს და ვფიქრობ, რომ ახლა ჩვენი დასავლური პარტნიორები უკვე სრულ სურათს ფლობენ რუსეთის მიზნების შესახებ. რუსეთის კონფლქიტები სამეზობლოში – საქართველოში, მოლდოვაში, უკრაინაში, ყარაბაღში, ეს არის შაბლონი, ეს არის ტენდენცია, ეს არის რუსეთის ტაქტიკა. ვფიქრობ, რომ დასავლეთის საზოგადოება უფრო გაერთიანდება და ჩვენ უფრო დიდი დახმარებას მივიღებთ, რათა ერთად გადავლახოთ ეს გამოწვევა”, – განაცხადა მამუკა ბახტაძემ.
მისივე თქმით, ცივილიზაციის გზაზე საქართველო საკმაოდ მტკიცე ერია და ძალიან მნიშვნელოვანია ადამიანებს შორის ურთიერთობა.
„კონსოლიდაცია დასავლურ საზოგადოებასთან, ჩვენი საზოგადოების სიმტკიცე საკმარისი იქნება, რომ ეს პრობლემა გადავჭრათ ერთად და მივიდეთ კონფლიქტის მშვიდობიან მოგვარებამდე. ჩვენთვის უმნიშვნელოვანესია ადამიანებს შორის ურთიერთობა. როდესაც არის ურთიერთობა, შეიძლება რაღაც კონსტრუქცია ააგო, პოლიტიკური გადაწყვეტილება იპოვო. მთავარია, ადამიანებს შორის ურთიერთობა და ჩვენ გვაქვს ამის კარგი საფუძველი. ჩვენ გვაქვს პოლიტიკური გადაწყვეტილების ძებნის შესაძლებლობა, რა თქმა უნდა, დრო და მზაობა სჭირდება, ამას სჭირდება ეფექტური სტრატეგია ჩვენი დასავლური მეგობრებიდან და მთელი საზოგადოების ჩართულობა. ჩვენ დარწმუნებული ვართ, მაგრამ არ გვაქვს ილუზიები. ჩვენ არ გვგონია, რომ ეს მოხდება ერთ დღე-ღამეში, მაგრამ ჩვენ ვიცით, რომ უახლოეს მომავალში ეს აუცილებლად მოხდება“, განაცხადა მამუკა ბახტაძემ.