პირველად საქართველოში, კურორტი თეთნულდი „ფრირაიდის“ (Freeride) კვირეულის ფარგლებში, 8-12 თებერვალს „ფრირაიდის“ მსოფლიო ტურის საკვალიფიკაციო (FWQ) ეტაპებს უმასპინძლებს.
„მთის კურორტების განვითარების კომპანიის“ ინფორმაციით, ღონისძიება ეკონომიკისა და მდგრადი განვითარების სამინისტროს „მთის კურორტების განვითარების კომპანიის“ ორგანიზებითა და USAID-ის ეკონომიკური უსაფრთხოების პროგრამის, მესტიის მუნიციპალიტეტის მერიის, სვანეთის დანიშნულების ადგილის მართვის ორგანიზაცია შან-ლენდისა და ტურიზმის ეროვნული ადმინისტრაციის მხარდაჭერით იმართება.
„ღონისძიების მაღალი სტანდარტით ჩატარება წარმოაჩენს საქართველოს სამთო-სათხილამურო კურორტების პოტენციალს საერთაშორისო მასშტაბით. გაზრდის საქართველოს სამთო-სათხილამურო კურორტების ცნობადობას და უფრო მიმზიდველს გახდის ადგილობრივი და უცხოელი დამსვენებლებისა და ინვესტორებისთვის, რაც, თავის მხრივ, ხელს შეუწყობს საქართველოში ტურიზმის განვითარებასა და შესაბამისი საინვესტიციო გარემოს შექმნას. საკვალიფიკაციო (FWQ) ეტაპები მოიცავს მცირე- ორვარსკვლავიან და დიდ – ოთხვარსკვლავიან შეჯიბრებებს.
მცირე შეჯიბრი უზრუნველყოფს ადგილობრივი და დამწყები სპორტსმენების ჩართულობას, ხოლო დიდი შეჯიბრი მაღალი რეიტინგის უცხოელი სპორტსმენების მონაწილეობასა და საერთაშორისო გაშუქებას. შეჯიბრებებში, 20 ქვეყნის 120-მდე სპორტსმენი მიიღებს მონაწილეობას. აღსანიშნავია, რომ „ფრირაიდის“ სპორტის სახეობებში არსებობს ღონისძიებების იერარქია, რომლის მიხედვით ხდება წლიური კალენდრის დაგეგმვა. საქართველოს მიეცა უნიკალური შესაძლებლობა, პირველივე წელს უმასპინძლოს მსოფლიო „ფრირაიდის“ შესარჩევ (Freeride World Qualifier) ყველაზე მაღალი კატეგორიის საკვალიფიკაციო ეტაპს, რომელიც 4 ვარსკვლავით ფასდება.
აღნიშნულ შეჯიბრზე უფრო მაღალი დონე მხოლოდ „ფრირაიდის“ მსოფლიო ტურია (Freeride World Tour), რომლის მასპინძლობის შესაძლებლობა საქართველოს მიეცემა საკვალიფიკაციო ეტაპების წარმატებით ჩატარების შედეგად“, – ნათქვამია ინფორმაციაში.