თეირანის მიერ ბოლო კვირების განმავლობაში საპროტესტო აქციების სასტიკად დარბევის საპასუხოდ, ევროკავშირმა „ირანის ისლამური რევოლუციის გუშაგთა კორპუსი“ ტერორისტულ ორგანიზაციათა სიაში შეიყვანა. ინფორმაციას ამის შესახებ BBC ავრცელებს.
„რეპრესიები უპასუხოდ არ უნდა დარჩეს“, – განაცხადა ბლოკის უმაღლესმა დიპლომატმა კაია კალასმა და დასძინა, რომ ეს ნაბიჯი ირანის მთავარ სამხედრო, ეკონომიკურ და პოლიტიკურ ძალას, „ირანის ისლამური რევოლუციის გუშაგთა კორპუსს“, ისეთი ჯიჰადისტების დონეზე დააყენებს, როგორიცაა „ალ-ყაიდა“ და „ისლამური სახელმწიფოს“ დაჯგუფება.
ირანის საგარეო საქმეთა მინისტრმა, აბას არაღჩიმ, ევროკავშირის გადაწყვეტილებას „ტრიუკი“ და „მნიშვნელოვანი სტრატეგიული შეცდომა“ უწოდა.
ადამიანის უფლებათა დამცველი ჯგუფების შეფასებით, დეკემბერსა და იანვარში კვირების განმავლობაში მიმდინარე არეულობების დროს უსაფრთხოების ძალებმა, მათ შორის „ირანის ისლამური რევოლუციის გუშაგთა კორპუსმა“ ათასობით მომიტინგე მოკლეს.
ხუთშაბათს, 29 იანვარს, ბრიუსელში გამოსვლისას, საფრანგეთის საგარეო საქმეთა მინისტრმა ჟან-ნოელ ბარომ ეს „ირანის თანამედროვე ისტორიაში ყველაზე ძალადობრივ რეპრესიად“ შეაფასა და განაცხადა, რომ „ჩადენილი დანაშაულებისთვის დაუსჯელობა შეუძლებელია“.
ადრე საფრანგეთი ყოყმანობდა „ირანის ისლამური რევოლუციის გუშაგთა კორპუსის“ ევროკავშირის ტერორისტულ სიაში შეყვანასთან დაკავშირებით, რადგან შიშობდნენ, რომ ამას ირანთან ყველანაირი დიპლომატიური ურთიერთობის გაწყვეტა შეიძლება გამოეწვია. თუმცა, 28 იანვარს, იტალიის ხელმძღვანელობით გამართულ შეკრებაზე, საფრანგეთმა შეხედულება შეიცვალა და მტკიცედ დაუჭირა მხარი „ირანის ისლამური რევოლუციის გუშაგთა კორპუსის“ ტერორისტულ სიაში შეყვანას.
„ნებისმიერი რეჟიმი, რომელიც ათასობით საკუთარ ადამიანს კლავს, საკუთარი თავის დაღუპვისკენ ისწრაფვის“, – განაცხადა კალასმა სოციალურ ქსელში გავრცელებულ მოკლე განცხადებაში.
კალასი მოელის, რომ ირანთან დიპლომატიური არხები ღია დარჩება, მაშინაც კი, როდესაც „ირანის ისლამური რევოლუციის გუშაგთა კორპუსი“ ტერორისტულ აქტებში ჩართული დაჯგუფებების სიაში შეიყვანეს.
ევროკავშირმა ასევე ახალი სანქციები დაუწესა ირანში 6 ორგანიზაციას და 15 ფიზიკურ პირს, მათ შორის შინაგან საქმეთა მინისტრ ესკანდარ მომენის, გენერალურ პროკურორს, მოჰამედ მოვაჰედი აზადის და თავმჯდომარე მოსამართლეს, იმან აფშარის.
„ისინი ყველა მონაწილეობდნენ მშვიდობიანი საპროტესტო აქციების ძალადობრივ რეპრესიებსა და პოლიტიკური აქტივისტებისა და ადამიანის უფლებათა დამცველების თვითნებურ დაპატიმრებაში“, – ნათქვამია ბლოკის განცხადებაში.
ევროკავშირის მიერ ტერორისტულ სიაში შეყვანილი ორგანიზაციები ექვემდებარებიან სანქციებს, მათ შორის აქტივების გაყინვასა და მოგზაურობის აკრძალვას.
ირანის ყველაზე ძლიერი შეიარაღებული ძალა, „ირანის ისლამური რევოლუციის გუშაგთა კორპუსი“, 1979 წლის რევოლუციის შემდეგ მალევე შეიქმნა ქვეყნის ისლამური სისტემის დასაცავად. სავარაუდოდ, მას დაახლოებით 190 000 აქტიური პერსონალი ჰყავს, რომლებსაც აქვთ სახმელეთო, საჰაერო და საზღვაო შესაძლებლობები, ასევე ირანის სტრატეგიული იარაღის ზედამხედველობა.
როგორც BBC წერს, ის გავლენას ახდენს საზღვარგარეთ მოკავშირე მთავრობებისა და შეიარაღებული ჯგუფებისთვის ფულის, იარაღის, ტექნოლოგიებისა და რჩევების მიწოდების კუთხით და ასევე აკონტროლებს ირანში არსებულ პარამილიტარულ „ბასიჯის წინააღმდეგობის ძალებს“, რომლებსაც ასობით ათასი წევრი ჰყავს და რომლებიც დისიდენტობის ჩასახშობად გამოიყენება.
ავსტრალიას, კანადას და აშშ-ს ირანის „ირანის ისლამური რევოლუციის გუშაგთა კორპუსი“ უკვე კლასიფიცირებული ჰყავთ, როგორც ტერორისტული დაჯგუფება, თუმცა დიდ ბრიტანეთში ის აკრძალული არ არის.
28 იანვარს, დიდი ბრიტანეთის ვიცე-პრემიერმა, დევიდ ლამიმ დაგმო ირანის მიერ „მშვიდობიანი მომიტინგეების სასტიკი ჩახშობა“, თუმცა განაცხადა, რომ მთავრობის დიდი ხნის პოლიტიკაა „არ გააკეთოს კომენტარი იმაზე, განიხილება თუ არა კონკრეტული ორგანიზაციის აკრძალვა“.
ევროკავშირის განცხადება მას შემდეგ გავრცელდა, რაც აშშ-ის პრეზიდენტმა დონალდ ტრამპმა ამ კვირის დასაწყისში განაცხადა, რომ „მასიური არმადა“ სწრაფად მოემართებოდა ირანისკენ.
ტრამპმა, მას შემდეგ, რაც სპარსეთის ყურეში აშშ-ის სამხედრო ძალები მუდმივად იზრდება, გააფრთხილა ირანი, რომ მისი ბირთვული პროგრამის შესახებ შეთანხმების მისაღწევად „დრო იწურება“.
აშშ-ის პრეზიდენტმა განაცხადა, რომ „მასიური არმადა“, აშშ-ის დიდი საზღვაო ფლოტი, „სწრაფად, დიდი ძალით, ენთუზიაზმითა და მიზანდასახულობით მოძრაობს“ ირანისკენ.
საპასუხოდ, ირანის საგარეო საქმეთა მინისტრმა, აბას არაღჩიმ, განაცხადა, რომ ქვეყნის შეიარაღებული ძალები მზად არიან, „ჩახმახზე თითები აქვთ დაჭერილი“, რათა „დაუყოვნებლივ და ძლიერად უპასუხონ“ ნებისმიერ აგრესიას ხმელეთიდან თუ ზღვიდან.
ირანი ამტკიცებს, რომ მისი ბირთვული პროგრამა სრულიად მშვიდობიანია და არაერთხელ უარყო აშშ-ისა და მისი მოკავშირეების ბრალდებები, რომ ის ბირთვული იარაღის შექმნას ცდილობს.
ტრამპის უახლესი გაფრთხილება მოჰყვა მის დაპირებას, რომ ვაშინგტონი ჩაერეოდა ირანში იმ პირების დასახმარებლად, ვინც იანვრის დასაწყისში საპროტესტო აქციების სასტიკი და უპრეცედენტო დარბევის მსვერპლი გახდა.
ტრამპის ბოლო კომენტარები ირანთან დაკავშირებით, როგორც ჩანს, უფრო მეტად ქვეყნის ბირთვულ პროგრამაზე იყო ორიენტირებული. „იმედია, ირანი სწრაფად „მიუჯდება მოლაპარაკებების მაგიდას“ და მოლაპარაკებას გამართავს სამართლიან და თანასწორ შეთანხმებაზე. არა, ბირთვულ შეიარაღებას“, – დაწერა მან Truth Social-ზე.
მან თქვა, რომ სპარსეთის ყურეში საზღვაო ძალები უფრო დიდია, ვიდრე ის, რაც მან ვენესუელაში გაგზავნა მანამ, სანამ აშშ-ის ძალები ქვეყნის ყოფილ ლიდერს, ნიკოლას მადუროს, დააკავებდნენ .
ტრამპმა დასძინა, რომ ეს ძალა „მზადაა, სურს და შეუძლია სწრაფად შეასრულოს თავისი მისია, საჭიროების შემთხვევაში, სისწრაფითა და ძალადობით“.
გასული წლის ივნისში ირანის ბირთვულ ობიექტებზე აშშ-ის მიერ განხორციელებულ დარტყმებზე საუბრისას, რომლებიც ირანსა და ისრაელს შორის 12-დღიანი ომის დროს განხორციელდა, აშშ-ის პრეზიდენტმა გააფრთხილა თეირანი: „შემდეგი თავდასხმა გაცილებით უარესი იქნება! ნუღარ გაიმეორებთ ამას“.
ირანის პარლამენტის თავმჯდომარემ, მოჰამედ ბაგერ ღალიბაფმა, CNN-თან ინტერვიუში განაცხადა, რომ თეირანი მზადაა აშშ-სთან მოლაპარაკებებისთვის, მაგრამ მხოლოდ იმ შემთხვევაში, თუ მოლაპარაკებები „ნამდვილი“ იქნება.
მომზადებულია ახალი ამბების სააგენტო GUARDIANGE-ის მიერ