ამერიკის შეერთებული შტატების პრეზიდენტმა, დონალდ ტრამპმა განაცხადა, რომ იაპონიას შეუძლია „ყოველგვარი გაფრთხილების გარეშე“ ჩამოაგდოს ჩრდილო კორეული რაკეტები იმ სამხედრო მოწყობილობებით, რასაც ის აშშ-ისაგან ყიდულობს.
ამასობაში იაპონიის პრემიერ მინისტრმა, შინძო აბემ თქვა, რომ მისმა ქვეყანამ შესაძლოა გზა გადაუჭრას რაკეტებს „თუ საჭიროება“ იქნება.
BBC-ის ცნობით, აღნიშნული განცხადებები ლიდერებმა იაპონიაში ტრამპის პირველი სახელმწიფო ვიზიტისას, რეპორტიორებთან გააკეთეს.
ორშაბათს, პრესკონფერენციაზე ჟურნალისტებისთვის პასუხების გაცემისას, ტრამპმა თქვა, რომ აბე შეერთებული შტატებისაგან „დიდი ოდენობით სამხედრო მოწყობილობებს“ შეისყიდის და როდესაც ეს შესყიდვა დასრულდება, იაპონიის პრემიერ მინისტრს შეეძლება ჩრდილოეთ კორეის რაკეტები „ყოველგვარი გაფრთხილების გარეშე“ ჩამოაგდოს.
შინძო აბემ განაცხადა, რომ იაპონიამ „ხარისხობრივად და რაოდენობრივად“ უნდა გააძლიეროს მისი თავდაცვის შესაძლებლობები იმ პირობებში, როცა ჩრდილო კორეასთან „ძალიან დაძაბული“ მდგომარეობაა.
მან ხაზი გაუსვა, რომ სარაკეტო თავდაცვა იაპონიასა და შეერთებულ შტატებს შორის „კანონიერ თანამშრომლობაზეა“ დაფუძნებული და თუკი რაკეტების ჩამოგდების „საჭიროება იქნება, რა თქმა უნდა ჩვენ ამას გავაკეთებთ“.
როგორც BBC იუწყება, ნათელი არაა, მოეწერა თუ არა სამხედრო შეთანხმებას ხელი ტრამპის ტოკიოში ვიზიტისას, მაგრამ ორი ქვეყანა ერთმანეთის ახლო სამხედრო მოკავშირეა და შეერთებული შტატები იაპონიაში რამდენიმე სამხედრო ბაზას ინარჩუნებს.
ორმა ლიდერმა კიდევ ერთხელ დაადასტურა, რომ მათ შორის მჭიდრო კავშირები არსებობს და პირობა დადო, რომ – ტრამპის სიტყვებით, „ჩრდილოეთ კორეის მუქარის წინააღმდეგ ერთად იდგებიან“.
შეერთებული შტატების პრეზიდენტმა, დონალდ ტრამპმა ჩრდილოეთ კორეის მიმართ კიდევ ერთხელ მკაცრი რიტორიკა გამოიჩინა მას შემდეგ რაც იგი იაპონიაში ჩავიდა – განაცხადა, რომ აშშ და მისი მოკავშირეები მზად არიან დაიცვან თავისუფლება. მან თქვა, რომ არც ერთმა „დიქტატორმა“ არასათანადოდ არ უნდა შეაფასოს ამერიკის გადაწყვეტილება.
როგორც BBC იტყობინება, ტოკიოს მახლობლად, კვირას, იოკოტას საჰაერო ბაზაზე შეერთებული შტატების ჯარებისადმი მიმართვისას მან საზეიმოდ დადო პირობა, რომ სამხედროებს აქვთ რესურსები, რომელიც მშვიდობისა და თავისუფლების დასაცავადაა საჭირო.
„არავინ, არც ერთმა დიქტატორმა, არც ერთმა რეჟიმმა… არ უნდა შეაფასოს არასანათოდ ამერიკული გადაწყვეტილება“, უთხრა პრეზიდენტმა ტრამპმა იაპონიაში ჩასვლიდან მალევე შეერთებული შტატების და იაპონიის ჯარებს.
იაპონიაში დაშვებამდე, მან ბორტ ნომერ პირველზე რეპორტიორებს უთხრა, რომ მისი ვიზიტისას მოელის, რომ რუსეთის პრეზიდენტს, ვლადიმერ პუტინს შეხვდება.
„მე ვფიქრობ, რომ ჩვენ გვექნება პუტინთან შეხვედრა. ჩვენ გვსურს პუტინის დახმარება ჩრდილოეთ კორეაზე“, განაცხადა ტრამპმა, რომელიც უკვე შეხვდა იაპონიის პრემიერ მინისტრ შინძო აბეს.
ტრამპი 12-დღიანი მოგზაურობისას სამხრეთ კორეას, ჩინეთს, ვიეტნამს და ფილიპინებს ეწვევა.
ვიეტნამის სანაპირო ქალაქ და ნანგში ტრამპი აზია-წყნარი ოკეანის ეკონომიკური თანამშრომლობის სამიტს დაესწრება და სახელმწიფო ვიზიტად ჩავა ჰანოიში.
ტრამპი მისი ვიზიტის ბლოს, 13 ნოემბერს ფილიპინების დედაქალაქ მანილაში სამხრეთ-აზიური სახელმწიფოების სამიტს დაესწრება, მაგრამ მისი მოგზაურობა კიდევ რამდენიმე დღით იქნება გახანგრძლივებული, ასე რომ მას შეეძლება დაესწროს აღმოსავლეთ აზიის სამიტს.
ბოლო დროს, როცა შეერთებული შტატების პრეზიდენტმა აზიაში ასეთი ხანგრძლივი ტურნე მოაწყო, 1991 წლის ბოლოს და 1992 წლის დასაწყისში იყო, როცა ჯორჯ ეიჩ დაბლიუ ბუში რეგიონს სტუმრობდა, წერს BBC.
GUARDIAN.GE