საავტომობილო გზების დეპარტამენტი, გარდაბნის მუნიციპალიტეტში, შიდასახელმწიფოებრივი მნიშვნელობის ვაზიანი-მარტყოფი-ნორიო-ღვთაებას საავტომობილო გზის რეაბილიტაციას ახორციელებს. პროექტი 2 მონაკვეთად არის დაყოფილი და ჯამში 13 კმ-მდე გზის რეაბილიტაცია მოხდება.
საავტომობილო გზების დეპარტამენტის ცნობით, სარეაბილიტაციო მონაკვეთი ძლიერ დაზიანებულია. ერთ დროს კაპიტალური საფარის მქონე გზა მთლიანად მწყობრიდან არის გამოსული. სავალ ნაწილზე ინტენსიურადაა წარმოქმნილი დიდი ზომის ორმოები, რაც გზით მოსარგებლეებისთვის გადაადგილებას აფერხებს.
როგორც საავტომობილო გზების დეპარტამენტში აცხადებენ, რეაბილიტაციის პროქტის ფარგლებში მოხდება გზის სრული რეაბილიტაცია. მოეწყობა ასფალტ-ბეტონის საფარი, ხელოვნური ნაგებობები, წყალგამტარი მილები, კიუვეტები, მოსახლეობის ეზოებში შესასვლელები, ადგილობრივ გზებთან მიერთებები, ავტოპავილიონები და ავტობუსის გასაჩერებელი მოედნი. რეაბილიტაცია ჩაუტარდება მონაკვეთზე არსებულ ხიდს. ასევე, გათვალისწინებულია გზის სავალი ნაწილის შემოფარგვლა და საგზაო ნიშნების მოწყობა. განხორცხიელდება რეაბილიტირებული გზის მონიშვნის სამუშაოები.
ვაზიანი-მარტყოფი-ნორიო-ღვთაებას საავტომობილო გზით, ადგილობრივ მოსახლეობასთან ერთად ღვთაების სამონასტრო კომპლექსის მომლოცველები სარგებლობენ. სამონასტრო კომპლექსამდე მისასვლელი გზის გამართულად ფუნქციონირება ტურისტული თვალსაზრისითაც ძალიან მნიშვნელოვანია. პროექტის დასრულების შემდეგ, ღვთაების მონასტრამდე მისვლა უსაფრთხოდ და კომფორტულად იქნება შესაძლებელი.
პროექტი, სახელმწიფო ბიუჯეტიდან ფინანსდება და მისი ღირებულება ჯამში 7 531 227 ლარია.
სამუშაოები 2018 წლის აპრილში დაიწყო და მიმდინარე წლის ოქტომბერში დასრულდება.