სახელმწიფო უსაფრთხოების სამსახურის ხელმძღვანელი უწყების საქმიანობის შესახებ პარლამენტს ანგარიშს აცნობს.
როგორც ვახტანგ გომელაურმა მოხსენებისას განაცხადა, გამოიკვეთა საქართველოს ტერიტორიაზე მოქმედი უცხო ქვეყნების სპეცსამსახურების მცდელობები, რომ გააძლიერონ პოლიტიკური გავლენები.
„რუსეთის ფედერაცია სოხუმსა და ცხინვალში ეტაპობრივი ანექსიის პოლიტიკას ახორციელებს. ოკუპირებულ ცხინვალის რეგიონში მიმდინარე წლის 22 თებერვალს მომხდარმა ფაქტმა, რასაც არჩილ ტატუნაშვილის სიცოცხლის ხელყოფა და ჩვენი ქვეყნის ორი მოქალაქის იძულებითი ტყვეობა მოჰყვა, კიდევ ერთხელ დაადასტურა, თუ როგორი რთულია უსაფრთხოების ვითარება აღნიშნულ რეგიონებში. საქართველოში უცხო ქვეყნების სპეცსამსახურების ძირითადი ამოცანებია – ქართულ საზოგადოებაში ანტიდასავლური განწყობების გაღვივება, საერთაშორისო დონეზე საქართველოს, როგორც საიმედო პარტნიორის, იმიჯის შელახვა, გატარებული კონტრდაზვერვითი ღონისძიებების შედეგად, გამოიკვეთა საქართველოს ტერიტორიაზე მოქმედი უცხო ქვეყნების სპეცსამსახურების მცდელობები, გააძლიერონ და გააფართოვონ პოლიტიკური გავლენები. საზოგადოებრივ აზრზე მანიპულირებისა და დეზინფორმაციის გავრცელებისთვის უცხო ქვეყნების სპეცსამსახურების მიერ შეიმჩნევა ექსპერტული სამეცნიერო კვლევითი ცენტრებისა და სააგენტოების შექმნის მცდელობა”, განაცხადა ვახტანგ გომელაურმა ანგარიშის წარდგენისას პარლამენტში.
სუს-ის ხელმძღვანელის მოხსენება ამ წუთებში დახურულ რეჟიმში გრძელდება. საჯარო ანგარიშის წარდგენის შემდეგ სხდომის დახურვა თავდაცვისა და უშიშროების კომიტეტის თავმჯდომარემ, ირაკლი სესიაშვილმა მოითხოვა და აღნიშნა, რომ სხდომის დახურვა საჭირო იყო, რადგან საიდუმლო დეტალები შეიძლება გაჟღერებულიყო.
სხდომის დახურვის წინააღმდეგ წავიდა ოპოზიცია, რასაც პარლამენტში დებატები მოჰყვა.