ამერიკელმა კანონმდებლებმა წინააღმდეგ მისცეს ხმა საომარი უფლებამოსილების შესახებ კანონპროექტს, რომელიც დონალდ ტრამპის ირანში შემდგომი სამხედრო მოქმედებების შესახებ ბრძანების გაცემის შესაძლებლობას შეზღუდავდა.
ისრაელის თავდაცვის ძალების განცხადებით, ირანმა ხუთშაბათს გამთენიისას ისრაელის მიმართულებით რამდენიმე რაკეტა ისროლა, თუმცა, მსხვერპლის შესახებ ინფორმაცია ჯერ არ გავრცელებულა, იტყობინება AFP ქვეყნის საგანგებო სიტუაციების სამსახურზე დაყრდნობით.
ორ საათში სამი ცალკეული განგაში გავრცელდა და „ფრანს პრესის“ რეპორტიორებმა იერუსალიმში აფეთქებების ხმა გაიგეს, თუმცა მას შემდეგ სამხედროებმა ხალხი თავშესაფრებიდან გაუშვეს.
მანამდე ისრაელის სამხედრო ძალებმა განაცხადეს, რომ მათ თეირანში სამხედრო ინფრასტრუქტურის წინააღმდეგ „დარტყმების ახალი ტალღა“ წამოიწყეს.
ახლო აღმოსავლეთის ქვეყნები, მათ შორის ლიბანი, ირანი და არაბთა გაერთიანებული საამიროები, სულ უფრო მეტად განიცდიან კონფლიქტის შედეგებს.
ირანში, აშშ-ში დაფუძნებული ადამიანის უფლებათა დამცველი აქტივისტების საინფორმაციო სააგენტოს ცნობით, 3 მარტისთვის, ომის დაწყებიდან 1000-ზე მეტი მშვიდობიანი მოქალაქე დაიღუპა და კიდევ ასობით დაღუპულის შესახებ ინფორმაცია გადახედვის პროცესშია.
აქ მოცემულია რამდენიმე ფოტო სხვადასხვა რეგიონიდან.
აშშ-ის სამხედრო ძალებმა კი კიდევ ორი სამხედრო მოსამსახურის ვინაობა დაადგინეს, რომლებიც, სავარაუდოდ, ქუვეითში დრონით თავდასხმის შედეგად დაიღუპნენ.
აშშ-ის თავდაცვის მდივანმა პიტ ჰეგსეთმა დაადასტურა, რომ ამერიკულმა წყალქვეშა ნავმა ინდოეთის ოკეანეში ირანული სამხედრო გემი ჩაძირა – პენტაგონმა დარტყმის ამსახველი ვიდეომასალა გამოაქვეყნა.
სავარაუდოდ, „ირის დენას“ ბორტზე დაახლოებით 180 ადამიანი იმყოფებოდა – 32 გადარჩა, შრი-ლანკის ხელისუფლების ცნობით კი, ამ დროისთვის 80 ცხედარია ნაპოვნი.
ირანელებმა BBC-ს განუცხადეს, რომ ქვეყნის დედაქალაქი თეირანი „თავს სიცარიელეში გრძნობს“ და რომ ისინი „ნორმალურ ცხოვრებას იმსახურებენ“.
კატარი დოჰაში, აშშ-ის საელჩოსთან ახლოს მცხოვრები მოქალაქეების ევაკუაციას ახორციელებს
კატარის შინაგან საქმეთა სამინისტროს ცნობით, დროებითი სიფრთხილის ზომების სახით დოჰაში, აშშ-ის საელჩოსთან ახლოს მცხოვრები მოსახლეობის ევაკუაცია დაიწყეს.
„მათთვის შესაბამისი საცხოვრებელი უზრუნველყოფილია აუცილებელი პრევენციული ზომების ფარგლებში“, – ნათქვამია სამინისტროს განცხადებაში.
ეს მას შემდეგ მოხდა, რაც ამ კვირაში საუდის არაბეთსა და ქუვეითში აშშ-ის საელჩოებსა და დუბაიში აშშ-ის საკონსულოს დრონებით დაესხნენ თავს.
ამ კვირაში აშშ-ის სახელმწიფო დეპარტამენტმა გააფრთხილა ამერიკის მოქალაქეები, დაუყოვნებლივ დაეტოვებინათ ახლო აღმოსავლეთი, მიუხედავად იმისა, რომ რეგიონიდან ბევრი რეისი გაუქმდა ან შეჩერდა.
აშშ-ის მთავრობა დიდი ძალისხმევით ცდილობს ჩარტერული რეისების დაჯავშნას არაბთა გაერთიანებულ საამიროებში, საუდის არაბეთსა და იორდანიაში მყოფი ამერიკელი მოქალაქეებისთვის და ასევე ცდილობს დაეხმაროს სხვაგან ჩარჩენილ ადამიანებს კომერციული რეისების ბილეთების დაჯავშნაში.
აშშ-ის სახელმწიფო დეპარტამენტის წარმომადგენელმა განაცხადა, რომ 28 თებერვლიდან ახლო აღმოსავლეთიდან აშშ-ში დაახლოებით 17 500 მოქალაქე დაბრუნდა.
GUARDIANGE